Թուրքիայի նախագահ Ռեջեփ Թայիփ Էրդողանը նախագահական նստավայրում կայացած կառավարության նիստից հետո հանդես է եկել հայտարարությամբ՝ անդրադառնալով երկրի արտաքին քաղաքականությանն ու ռազմարդյունաբերությանը։
Էրդողանը հայտնել է, որ ռազմական արտադրանքի արտահանման ծավալներով Թուրքիան ներկայումս աշխարհում զբաղեցնում է 11-րդ տեղը։ Նրա խոսքով՝ թուրքական նավաշինարաններում այս պահին արտադրվում է ավելի քան 50 ռազմանավ, իսկ մինչ օրս արտահանվել է շուրջ 140 ծովային հարթակ։
«Հունիսի 20-ին Ստամբուլում կայացած արարողության ժամանակ մեր սեփական կարողություններով մշակված կորվետը (ռազմանավի տեսակ` խմբ.) հանձնեցինք Ռումինիայի ռազմածովային ուժերին։ Այսպիսով մեր պատմության մեջ առաջին անգամ ռազմանավ արտահանեցինք ՆԱՏՕ-ի և Եվրամիության (ԵՄ) անդամ երկիր»,- նշել է Թուրքիայի նախագահը։
Անդրադառնալով Լեհաստանի նախագահ Կարոլ Նավրոցկիի հետ հունիսի 23-ին կայացած հանդիպմանը՝ Էրդողանը նշել է, որ երկու երկրների միջև առևտրաշրջանառության նոր թիրախ է սահմանվել 15 մլրդ դոլարը։ Հանդիպման ընթացքում քննարկվել են նաև ռազմարդյունաբերական համագործակցությունը, ռուս-ուկրաինական պատերազմն ու իրանական ճգնաժամը։
Աղբյուր՝ Trt Haber
