Նորվեգիան վերջին պահին չեղարկել է Մալայզիային «NSM» հականավային հրթիռների վաճառքի պայմանագիրը՝ հայտարարելով, որ նման տեխնոլոգիաները տրամադրվելու են միայն ՆԱՏՕ-ի անդամներին և մոտ դաշնակիցներին: Օսլոյի այս քայլը խիստ քննադատության է արժանացել Մալայզիայի պաշտպանության նախարարության կողմից։
Թուրքական լրատվամիջոցների փոխանցմամբ՝ ստեղծված իրավիճակում Մալայզիան կարող է դիմել Անկարայի օգնությանը:
Մալայզիան նախ դիմել էր Վաշինգտոնին, սակայն տարածաշրջանային հակամարտությունների և սպառազինության պաշարների նվազման պատճառով ԱՄՆ-ի կարողությունը՝ արագ մատակարարումներ իրականացնելու, հարցականի տակ է:
Ռազմական փորձագետների գնահատմամբ՝ թուրքական արտադրության «ATMACA» հականավային հրթիռը կարող է լավագույն լուծումը դառնալ Մալայզիայի համար: Նշվում է, որ թուրքական հրթիռն իր հեռահարությամբ չի զիջում նորվեգական մոդելին, իսկ որոշակի արդիականացումներից և նոր նշանառության համակարգերի ինտեգրումից հետո այն կարող է լիովին բավարարել Մալայզիայի ռազմածովային ուժերի կարիքները:
Աղբյուր՝ Trt Haber
