Թուրքիայի պաշտպանության նախարարության (ՊՆ) մամուլի և հասարակայնության հետ կապերի խոսնակ, կոնտր-ադմիրալ Զեքի Աքթյուրքը հայտարարություն է արել երկրում օրակարգային դարձած «լուծման գործընթացի» (çözüm süreci) վերաբերյալ, որի նպատակն է լուծել Թուրքիայի քրդերի հետ կապված խնդիրներն ու վերջ դնել քրդերի զինված պայքարին:
Աքթյուրքը շեշտել է, որ Թուրքիայի զինված ուժերն այս գործընթացում ևս շարունակելու են կատարել իրենց առաջադրված խնդիրներն ու ստանձնած գործառույթները։
«Թուրքիան առանց ահաբեկչության» տեսլականի իրականացումը կնպաստի ոչ միայն մեր երկրի, այլև տարածաշրջանում խաղաղության, անվտանգության և կայունության հաստատմանը»,-ասվել է հայտարարությունում:
Կոնտր-ադմիրալը անդրադարձել է նաև Թուրքիայի կողմից ահաբեկչական ճանաչված «Քուրդիստանի բանվորական կուսակցության» (ՔԲԿ-PKK) զինաթափմանը միտված վերջին ռազմական գործողություններին:
«Քարանձավներում, ապաստարաններում և թաքստոցներում ականների և ինքնաշեն պայթուցիկ սարքերի հայտնաբերման և ոչնչացման աշխատանքները շարունակվում են»։
Հիշեցնենք, որ այժմ Թուրքիայի խորհրդարանում քննարկվում է և խորհրդարանական խմբակցություններին է ներկայացվում գործընթացն օրինականացնելու «Շրջանակային օրենքի նախագծիը»: Իշխող «Արդարություն և զարգացում» կուսակցությունն էլ սկսել է ընդդիմադիր կուսակցություններին այցելելու գործընթաց՝ դրա վերաբերյալ քննարկումներ անելու և առաջարկություններ ստանալու համար:
Աղբյուր՝ Rudaw
