Իսրայելական հեղինակավոր «Haaretz» պարբերականի խմբագրական հոդվածում նախազգուշացում է հնչել, որ Իսրայելի վարչապետ Բենիամին Նեթանյահուն Սիրիայի հյուսիսին հասցվող վերջին հարվածներով Իսրայելին տանում է Թուրքիայի հետ անիմաստ բախման։
Ըստ հոդվածի՝ Իսրայելում սպասվող ընտրություններից առաջ նկատվում է հակաթուրքական քաղաքական հռետորաբանության աճ։ Թեև Նեթանյահուն սիրիական տարածքներին հասցվող հարվածները պատճառաբանում է որպես «տարածաշրջանում թուրքական ներկայության ընդլայնման դեմ ուղղված քայլ», թե՛ Թուրքիան և թե՛ ԱՄՆ-ն հերքում են այդ պնդումները՝ համարելով, որ վարչապետը գործում է բացառապես սեփական ընտրական շահերից ելնելով։
Անկարայում ԱՄՆ դեսպան, ինչպես նաև Սիրիայի և Իրաքի հարցերով հատուկ ներկայացուցիչ Թոմ Բարաքը նույնպես զգուշացրել է, որ Սիրիայում իրականացվող հարձակումները կարող են ուղղակի ռազմական բախում հրահրել Թուրքիայի և Իսրայելի միջև։ Դեսպանն ընդգծել է, որ Անկարան Իսրայելին թիրախավորելու մտադրություն չունի, իսկ Իսրայելը նախընտրական շրջանի պատճառով կարող է գործել «ոչ ողջամիտ»։
«Haaretz»-ը շեշտում է, որ Թուրքիան հանդիսանում է ՆԱՏՕ-ի անդամ և ԱՄՆ-ի մոտ դաշնակիցը։ Պարբերականը կոչ է անում Իսրայելի իշխանություններին ականջալուր լինել ամերիկյան կողմի զգուշացումներին և խուսափել Թուրքիայի հետ առճակատումից, քանի որ անվտանգության ապահովումն ու սպառնալիքների կանխումը հնարավոր չէ իրականացնել միայն ռմբակոծություններով։
Աղբյուր՝ Kronos Haber
