Իսրայելի վարչապետ Բենյամին Նեթանյահուն «Abu Ali Express» տելեգրամյան ալիքին տված հարցազրույցում անդրադարձել է Թուրքիա-Իսրայել հարաբերություններին։ Նեթանյահուն, ասելով, որ չնայած Անկարայի հետ փոխզիջման եզրեր են փնտրում, չեն կարող անտեսել Թուրքիայի կողմից իրենց համար ապագայում ստեղծվելիք հնարավոր սպառնալիքի գործոնը։
«Ես հույս ունեմ, որ այդ սպառնալիքն իրականաություն չի դառնա, սակայն դա ամբողջովին բացառել չենք կարող»։
Նշելով նաև, որ փնտրում են Իսրայել-Թուրքիա համակեցության մեխանիզմ, Իսրայելի վարչապետն անդրադարձել է Սիրիայում երկու երկրների միջև առկա լարվածությանը․ «Գործնականում մենք խոչընդոտել ենք նրանց մուտքը հարավային Սիրիա։ Ցանկանում էին գալ նաև մեր սահմանին մոտ գտնվող հատված, բայց ես ասացի, որ դա չի լինելու։ Մենք չցանկացանք նաև, որ նրանք մտնեն T-4 ռազմաբազա՝ այսինքն Սիրիայի կենտրոն և հարվածեցինք այդ օդանավակայանին»։
Նեթանյահուն խոսել է նաև երկու երկրների միջև ոչ հանրային քննարկումների մասին և ընդգծել, որ այդպիսի դիվանագիտական շփումներն այժմ շարունակվում են և որ Իսրայելի ապագա ռազմական պլանավորումներն իրականացվելու են Թուրքիայի կողմից զարգացվելիք ռազմական կարողունակությանը համապատասխան։
«Մենք չենք մտածում հրաժարվել մեր ռազմական առավելությունից։ Մենք չենք փնտրում թշնամի, սակայն թույլ չենք տա ոչ մի երկրի սպառնալ մեզ»,- հայտարարել է Իսրայելի վարչապետը։
Վերջինս նաև խոսել է Թուրքիայի և ԱՄՆ-ի միջև կնքված F-35 կործանիչների գործարքին և այն հարցին, թե արդյո՞ք Թուրքիան կկարողանա ԱՄՆ-ից ստանալ այդ կործանիչները, Նեթանյահուն պատասխանել է․ «Այդ հավանականությունը չափից շատ հեռու է, եթե իհարկե իրականում կա նման հավանականություն»։
Թուրքական մամուլում Իսրայելի վարչապետի հայտարարությունները ստացել են հիմնականում հետևյալ վերնագրային բնորոշումը․ «Նեթանյահուն անդադար օգտագործում է Թուրքիա անունը․ սպառնալիքի հավանականությունը չի կարող անտեսվել»։
Հիշեցնենք, որ Իսրայելի և Թուրքիայի միջև հարաբերությունները լարվել էին դեռևս 2023-ի հոկտեմբերի 7-ից հետո՝ երբ իսրայելա-պաղեստինյան հակամարտությունը հերթական անգամ մտավ արյունահեղ բախումների փուլ։ Թուրքիան անթաքույց և պաշտոնական մակարդակով մինչ օրս քննադատում է Իսրայելին Գազայի հատվածում իրականացրած գործողությունների համար, իսկ Նեթանյահուին անվանում՝ «ցեղասպան»։
Աղբյուր՝ Nefes
