Ֆիդանը շփումներ է ունեցել Բրյուսելում

Թուրքիայի արտգործնախարար Հաքան Ֆիդանը երկկողմ հանդիպումներ է անցկացրել Բելգիայի մայրաքաղաք Բրյուսելում ընթացող ՆԱՏՕ անդամ երկրների ԱԳ ղեկավարների գագաթնաժողովի շրջանակում: ՆԱՏՕ-ի կենտրոնակայանում վերջինս հանդիպել է Եվրահանձնաժողովի ընդլայնման համար պատասխանատու Մարթա Կոսի հետ:

Բացի այդ, Ֆիդանը հանդիպել է Եվրամիության (ԵՄ) արտաքին քաղաքականության և անվտանգության քաղաքականության բարձր ներկայացուցիչ Կայա Կալլասի հետ: Այս մասին տեղեկությունը հրապարակվել է նախարարության «NSosyal» սոցհարթակի հաշվում կատարած գրառման մեջ:

Հիշեցնենք, որ նախքան Ֆիդանի այցը Թուրքիայի պետական «Trt Haber» լրատվական հեռուստաալիքի հաղորդմամբ՝ Բրյուսելում նախատեսվում էին քննարկումներ Գազայում վերջին զարգացումներին, հրադադարին և ռուս-ուկրաինական պատերազմն ավարտելուն միտված քայլերին վերաբերող հարցերի շուրջ:

Աղբյուր՝ Trt Haber