Թուրքիայի արտգործնախարար Հաքան Ֆիդանն արաբերեն հեռարձակվող կատարական «Al Jazeera» հեռուստաալիքի հետ զրույցում անդրադարձել է Սիրիայի և Պաղեստինի վերաբերյալ օրակարգային հարցերի: Վերջինս հայտարարել է, որ Գազայի խաղաղության գործընթացին հասնելը հեշտ չի եղել:
«Դրա ետևում մեծ ջանք, աշխատանք և իրականում մեծ տխրություն կա․ Ոչ միայն իսլամական, արաբական, այլ ամբողջ աշխարհի մարդկության: Այդ քաղաքացիները, անմեղները, կանայք և երեխաները 2 տարի ի վեր սպանվեցին բոլորի աչքի առաջ: Իհարկե 70.000 մարդու մահը, տասնյակ հազարավորների վիրավորվելն ու անհետ կորելը մարդկության խղճի վրա շատ լուրջ վերք են թողել»,-ասել է Ֆիդանը:
Բացի այդ, նա ընդգծել է, որ այս փուլում այն ամենն ինչ ցանկանում են իրականացնել, բայց չի ստացվում և չնայած նրան, որ զգալի չափով հումանիտար օգնություն է գնում, մուտքի և ելքի հետ կապված կրկին խնդիր կա Գազայում: «Խաղաղության պլանով նախատեսված կետերը շատ դեպքերում չեն կատարվում և, ցավոք, Իսրայելն ամեն օր շարունակում է սպանել պաղեստինցիների»,- հավելել է Թուրքիայի արտգործնախարարը:
Իսրայելի հասցեին Գազայում տեղի ունեցող իրադարձությունների համար քննադատություններ և մեղադրանքներ հնչեցնելուց հետո Ֆիդանը խոսել է նաև Սիրիայի մասին: Այս համատեքստում Թուրքիայի արտգործնախարարն ընդգծել է, որ այն հնարավորւթյունը, որ աշխարհը փորձում է տալ Սիրիային, Իսրայելը տալ չի ցանկանում:
«Նախ և առաջ հաջողություններ եմ մաղթում բոլոր սիրիացիներին և տարածաշրջանի ժողովրդին Սիրիայի ազատագրման առաջին տարվա կապակցությամբ»,- հավելել է Ֆիդանը՝ քննադատելով Սիրիայի նախկին առաջնորդ Բաշար ալ-Ասադի կառավարման տարիները:
Բացի այդ, Թուրքիայի արտգործնախարարն անդրադարձել է «Սիրիայի քրդական ինքնապաշտպանական ուժեր» (YPG) (Սիրիայի հյուսիս-արևելքում գործող քրդական ուժեր) գործունեությանը՝ շեշտելով, որ վերջիններս հրաժարվում են Սիրիայում մարտի 10-ին ձեռք բերված համաձայնությամբ ստանձնած անհրաժեշտ քայլերի իրականացումից:
«Տարածաշրջանից դուրս դերակատարների՝ իրենց խաղի մեջ մտնելը և նրանցից ստացված մի շարք նշաններով քաղաքականություն ձևավորելը լավ բան չէ»,- եզրափակել է Ֆիդանը:
Աղբյուր՝ Trt Haber
