Թուրքիայի նախագահ Ռեջեփ Թայիփ Էրդողանը հայտարարել է, որ տարածաշրջանում ընթացող պատերազմը ոչ միայն տեղային բնույթ ունի, այլ արդեն գլոբալ հետևանքներ է առաջացնում, սակայն Անկարան վճռական է՝ երկիրն այդ կրակի օղակից հեռու պահելու հարցում:
Կառավարության նիստից հետո ժողովրդին ուղղված ելույթում Էրդողանն ընդգծել է, որ վերջին շաբաթները հստակ ցույց են տվել, որ թեև պատերազմն Իսրայելի նախաձեռնությունն է, դրա հետևանքները կրում է ամբողջ աշխարհը։
«Վերջին 25 օրը ցույց տվեց, որ սա Իսրայելի պատերազմն է, բայց դրա գինը վճարում է ողջ աշխարհը։ Սա Նեթանյահուի իշխանությունը պահելու պատերազմ է, սակայն դրա գինը վճարում է 8 միլիարդ մարդ»,- նշել է նա։
Էրդողանը զգուշացրել է, որ հակահարվածների շղթան, հատկապես Ծոցի երկրներում, կարող է ավելի մեծ լարվածություն առաջացնել, խթանել ատելությունը և վտանգել տարածաշրջանային կայունությունը։ Նա ընդգծել է, որ արդեն մի շարք երկրներ ստիպված են դիմել արտակարգ միջոցների՝ սկսած վառելիքի սահմանափակումներից մինչև կրթական համակարգի ժամանակավոր դադարեցումներ, ինչը վկայում է պատերազմի տնտեսական ծանր հետևանքների մասին։
Թուրքիայի նախագահը կոչ է արել անհապաղ դադարեցնել ռազմական գործողությունները՝ նշելով, որ Նեթանյահուի գլխավորած քաղաքականությունը պետք է կանգնեցվի. «Ավելի շատ ավերածություններ և արյունահեղություն թույլ չտալու համար այս անիմաստ և անօրինական պատերազմը պետք է ավարտվի։ Պետք է բացվի երկխոսության ճանապարհը և արագ սկսվեն արդյունավետ բանակցություններ»:
Աղբյուր՝ Trt Haber
