Ֆիդանը պաշտոնական այցով կմեկնի Ավստրիա

Թուրքիայի արտաքին գործերի նախարար Հաքան Ֆիդանն ապրիլի 29-30-ը պաշտոնական այց կկատարի Ավստրիա, որտեղ կհանդիպի երկրի եվրոպական և միջազգային հարցերի նախարար Բեատե Մայնլ-Ռայզինգերի հետ։

Թուրքիայի ԱԳՆ աղբյուրների համաձայն՝ այցի շրջանակում նախատեսվում է նաև Ֆիդանի հանդիպումը Ավստրիայի կանցլեր Քրիստիան Շտոքերի, ինչպես նաև ԵԱՀԿ գլխավոր քարտուղար Ֆերիդուն Սինիրլիօղլուի հետ։

Նշվում է, որ կողմերը կքննարկեն թուրք-ավստրիական քաղաքական, տնտեսական, առևտրային և մշակութային հարաբերությունները, ինչպես նաև համագործակցության խորացման հնարավորությունները։ Ֆիդանը նաև ելույթ կունենա Վիեննայի դիվանագիտական ակադեմիայում և կհանդիպի Ավստրիայում գործող թուրքական համայնքի ներկայացուցիչների հետ։

Աղբյուր՝ Hürriyet