Թուրքիայի նախագահականի հանրային կապերի վարչության ղեկավար Բուրհանեթին Դուրանը հայտարարել է, որ Անկարայի և Էր Ռիադի միջև տրանսպորտի, լոգիստիկայի և տարածաշրջանային փոխկապակցվածության ոլորտներում զարգացող գործակցությունը Թուրքիայի նախագահ Ռեջեփ Թայիփ Էրդողանի վարած «տեսանելի դիվանագիտության» արդյունքն է։
Դուրանն իր սոցիալական էջում արված հրապարակման մեջ շեշտել է, որ դարեր շարունակ մայրցամաքները միմյանց կապող առևտրային ճանապարհների կենտրոնում գտնվող Թուրքիան «այսօր էլ շարունակում է մնալ տարածաշրջանային տնտեսական գործակցության հզոր դերակատար»։
Թուրք պաշտոնյան ուշադրություն է հրավիրել տարածաշրջանային ճգնաժամերի ֆոնին նոր տրանսպորտային միջանցքների ստեղծման կարևորության վրա: Նրա խոսքով՝ զարգացող ալտերնատիվ տրանսպորտային երթուղիները միտված են ապահովելու տնտեսական հարատևությունն ու առևտրի զարգացումը։
Բացի այդ, Դուրանը նշելէ, որ այս գործակցությունն ուղղված է ոչ միայն երկկողմ կապերի սերտացմանը, այլև տարածաշրջանում ընդհանուր կայունության ամրապնդմանը։
«Թուրքիան, նախագահ Էրդողանի առաջնորդությամբ, փոխադարձ շահի, համագործակցության և համատեղ զարգացման հիման վրա շարունակելու է ամրապնդել տարածաշրջանային կապերն ու բացել հնարավորությունների նոր դռներ»,- հավելել է պաշտոնյան։
Աղբյուր՝ Anadolu
