Թուրքիայի գլխավոր ընդդիմադիր ուժը համարվող «Ժողովրդահանրապետական» կուսակցության (ԺՀԿ-CHP) շուրջ ստեղծված ճգնաժամի ֆոնին թուրքական լրատվամիջոցները գրում են, որ կուսակցության ընտրված ղեկավար Օզգյուր Օզելը, ով դատարանի որոշմամբ զրկվեց ղեկավարի լիազորություններից, դիտարկում է նոր քաղաքական ուժ ստեղծելու տարբերակը։
«Habertürk»-ի լրագրող Մահիր Քըլըչի տեղեկություններով էլ՝ Օզելին մոտ կանգնած աղբյուրները սպասում են ամենաուշը մինչև հուլիսի 11-ը կուսակցության արտահերթ համագումարի մասին կայացվելիք որոշմանը։ Միաժամանակ ակնկալվում է, որ մինչև հուլիսի 20-ին սկսվող դատական համակարգի արձակուրդը Թուրքիայի վճռաբեկ դատարանը վերջնական որոշում կկայացնի իրավական գործընթացի վերաբերյալ։
Թուրքիայում արտահերթ ընտրությունների հնարավորության դեպքում էլ քննարկվում է արդեն գրանցված որևէ կուսակցության միջոցով ընտրություններին մասնակցելու տարբերակը։ Նշվում է, որ Օզելի թիմը կապեր է հաստատել «Անադոլուի միասնություն» և նախկին պատգամավոր Օզթյուրք Յըլմազի գլխավորած «Նորարարություն» կուսակցությունների հետ։
Աղբյուրի համաձայն՝ հնարավոր նոր քաղաքական ուժի համար ամենահավանական անվանումը «Yeni Parti» է (Նոր կուսակցություն)։
Հիշեցնենք, որ դատարանն Օզյուր Օզելի պաշտոնավարումը բացարձակ անվավեր էր ճանաչել, ինչից հետո էլ ԺՀԿ նախկին առաջնորդ Քեմալ Քըլըչդարօղլուն կրկին դարձել է կուսակցության նախագահ:
Աղբյուր՝ Artı Gerçek
