Թուրքիայի արտաքին գործերի նախարար Հաքան Ֆիդանը Եգիպտոս կատարած այցի շրջանակներում հանդիպել է իր գործընկեր Բեդր Աբդուլաթիի հետ։ Համատեղ մամուլի ասուլիսի ժամանակ Ֆիդանն անդրադարձել է Թուրքիայի, Սաուդյան Արաբիայի և Պակիստանի միջև ստորագրված «Մեքքայի համաձայնագրին»՝ նշելով, որ այն պատմական նախաձեռնություն է տարածաշրջանային խնդիրները սեփական ուժերով լուծելու համար։ Նա ընդգծել է, որ Եգիպտոսն այս դաշինքի բնական գործընկերն է և հույժ կարևոր է նրա պաշտոնական անդամակցությունը։
Անդրադառնալով տարածաշրջանային խնդիրներին՝ նախարարը նշել է, որ Թուրքիան և Եգիպտոսն ունեն ընդհանուր տեսլական Լիբիայի միասնության ու ինքնիշխանության հարցում։ Անդրադառնալով Պաղեստինի Գազայի հատվածի հարցին՝ Ֆիդանը խստորեն քննադատել է Իսրայելի վարչապետ Բենյամին Նեթանյահուի քաղաքականությունը: Նա վերջինիս մեղադրել է միջազգային հանրությանը սադրելու և խաղաղության պլանն արհամարհելու մեջ։
Նշվել է նաև, որ տնտեսական ոլորտում կողմերը նպատակադրվել են առևտրաշրջանառությունը հասցնել 15 մլրդ դոլարի։ Այս նպատակով ստորագրվել է ազատ առևտրի համաձայնագրի փոփոխման որոշումը, իսկ Եգիպտոսը միացել է Աֆրիկայի հետ տրանսպորտային կապի ամրապնդման հուշագրին։ Ֆիդանը նաև իր գոհունակությունն է հայտնել եգիպտացի ֆուտբոլիստ Մուհամմեդ Սալահի՝ թուրքական «Trabzonspor» տեղափոխվելու առնչությամբ՝ այն համարելով երկու ժողովուրդների մերձեցման գեղեցիկ առիթ։
Աղբյուր՝ TRT Haber
