Թուրքիայի խորհրդարանի նախագահ Նուման Քուրթուլմուշը մեկնել է Ֆինլանդիա։ Նա այնտեղ մասնակցել է Ֆինլանդիա-Թուրքիա միջխորհրդարանական բարեկամության խմբի հովանու ներքո կազմակերպված «Փոփոխվող աշխարհում Թուրքիան՝ որպես գործընկեր, հավասարակշռող և ռազմավարական դերակատար» թեմայով համաժողովին։
Քուրթուլմուշն անդրադառնալով մի շարք հարցերի՝ խոսել է նաև Հայաստան-Ադրբեջան հարաբերությունների կարգավորման գործընթացի վերաբերյալ ու ընդգծել, որ Հարավային Կովկասում այդ երկու երկրների միջև հակամարտությունն արդեն անցյալում է։
«Ադրբեջանն ու Հայաստանը մտել են համաձայնության որոշակի ուղի, և Թուրքիան չափազանց լուրջ աջակցություն է ցուցաբերում այս գործընթացին: Հույս ունեմ, որ շատ կարճ ժամանակում մենք աշխարհին կհայտնենք Ադրբեջանի և Հայաստանի հարաբերությունների կարգավորման մասին լուրեր։ Այսպիսով, մեր տարածաշրջանում, որտեղ նախկինում եղել են հակամարտություններ և լարվածություններ, այդ լարված վիճակը կլուծվի, և կշարունակվեն քայլեր, որոնք կբխեն բոլոր երեք երկրների շահերից»:
Աղբյուր՝ Hürriyet
