Թուրքիայի արտաքին գործերի նախարար Հաքան Ֆիդանը Ռուսաստան կատարած այցի շրջանակներում Կազանում հանդիպել է ՌԴ նախագահ Վլադիմիր Պուտինին:
Դիվանագիտական աղբյուրների փոխանցմամբ՝ հանդիպման սկզբում Պուտինը գոհունակություն է հայտնել երկկողմ հարաբերությունների զարգացման կապակցությամբ՝ ընդգծելով, որ դրանք վաղուց դուրս են եկել ֆորմալ շրջանակներից:
«Մեր շփումները մեծապես Թուրքիայի նախագահ Ռեջեփ Թայիփ Էրդողանի դիրքորոշման շնորհիվ ձեռք են բերել իսկապես բարեկամական բնույթ և օրեցօր հարստանում են նոր բովանդակությամբ: Խնդրում եմ իմ ամենալավ մաղթանքները փոխանցեք նրան»,- նշել է ՌԴ նախագահը՝ հավելելով, որ միշտ ուրախ կլինի Էրդողանին տեսնել Ռուսաստանում:
Թուրքիայի ԱԳ նախարարն իր հերթին Պուտինին է փոխանցել Էրդողանի ողջույնները և կարևորել Մոսկվայի դիրքորոշումը տարածաշրջանային ու համաշխարհային զարգացումների վերաբերյալ։
«Մեր տարածաշրջանում և աշխարհում շատ կարևոր իրադարձություններ են տեղի ունենում։ Որոշակի հարցերի շուրջ Ձեր տեսակետները կարևոր են։ Քննարկելու շատ թեմաներ ունենք»,- ասել է Ֆիդանը՝ հավելելով, որ վերջին երկու օրերին բավականին ինտենսիվ ու մանրամասն քննարկումներ են անցկացրել:
Աղբյուր՝ Trt Haber
