Թուրքիայում քրդական հարցի կարգավորման «Խաղաղության և ժողովրդավարական հասարակության գործընթացի» շրջանակներում նոր զարգացումներ են տեղի ունեցել. Իմրալը կղզում կայացել է հանդիպում Թուրքիայի կողմից ահաբեկչական ճանաչված «Քուրդիստանի բանվորական կուսակցության» (ՔԲԿ-PKK) հիմնադիր-առաջնորդ, անազատության մեջ գտնվող Աբդուլլահ Օջալանի հետ:
Ընդդիմադիր «Ժողովուրդների հավասարություն և ժողովրդավարություն» կուսակցության (DEM) Իմրալիի պատվիրակությունը (Փերվին Բուլդան, Օզգյուր Ֆաիք Էրոլ, Միթհաթ Սանջար) 5-ժամյա ծավալուն հանդիպում է ունեցել Օջալանի հետ։ Հանդիպումից հետո էլ հայտարարել է անհրաժեշտ իրավական քայլերի մասին։
«DEM» համանախագահ Թունջեր Բաքըրհանն ընդգծել է, որ Թուրքիան գտնվում է պատմական շրջադարձային փուլում, և դեմոկրատական երկրի կառուցման ելակետը «Շրջանակային օրենքն» է։ Նա հայտարարել է, որ «Շրջանակային օրենքը» պետք է երաշխավորի Օջալանի աշխատանքային ու կապի ազատ պայմանները և որ նրա կարգավիճակը պետք է օրենսդրորեն կարգավորվի։
Նա ուշադրություն է հրավիրել, որ եթե ընդունվի թեմայի վերաբերյալ «միակողմանի և պարտադրող օրենք, ոչ թե ճանապարհ կբացվի, այլ կփակվի»
Բաքըրհանը նաև կոչ է արել վերացնել համայնքապետարաններում հոգաբարձուների (Քայյում) նշանակման գործելաոճը, ազատ արձակել քաղբանտարկյալներին (այդ թվում՝ Սելահաթթին Դեմիրթաշին և Ֆիգեն Յուքսեքդաղին), բացել Նուսայբին-Քամիշլո սահմանային անցակետը և աշխատանքի վերականգնել «Խաղաղության ակադեմիկոսներին»։
Հանդիպումից հետո Օջալանն էլ ուղերձ է տարածել, որում շեշտել է, որ հավատարիմ է մնում փետրվարի 27-ի հայտարարության ոգուն և նշել.
«Անատոլիայում քուրդ-թուրքական պատմական դաշինքն ու միասնությունը իրավական հարթակ փոխադրելու շեմին ենք։ Եկել է փոխադարձ զգայունությունները հաշվի առնող իրավական հիմքեր ստեղծելու ժամանակը։ Թուրքիայի ազգային մեծ ժողովը (ԹԱՄԺ/TBMM) պետք է սկսի համապատասխան օրենսդրական գործընթացը՝ զենքերն ու բախումները վերջնականապես օրակարգից հանելու համար»։
Աղբյուր՝ Arti Gerçek
