Թուրքիայի ներքին գործերի նախարարությանը կից «Ոստիկանության գլխավոր վարչության» (EGM) տվյալներով՝ 2026-ի 1-ին կիսամյակում նախագահ Ռեջեփ Թայիփ Էրդողանի և նրա ընտանիքի պահպանության համար ծախսվել է 1.983 մլրդ թուրքական լիրա, որը համարժեք է 41.725 մլն դոլարին։
Նշված գումարը գերազանցում է ոստիկանության այնպիսի ստորաբաժանումների ծախսերը, ինչպիսիք են հետախուզական, ահաբեկչության դեմ պայքարի, կիբերհանցագործությունների և թմրանյութերի դեմ պայքարի վարչությունները։ Զուգահեռ նշվում է, որ Թուրքիայի նախագահի անվտանգության ապահովման համար հատկացվող միջոցները տարեցտարի շարունակում են աճել. եթե 2020-ին այդ նպատակով ծախսվել էր 263.1 մլն, ապա 2025-ին այդ ցուցանիշն արդեն հասել էր 2.9 մլրդ լիրայի, կամ որն է՝ 61.20 մլն դոլար։
Թուրքական ընդդիմադիր աղբյուրն ուշադրություն է հրավիրում այն բանի վրա, որ Էրդողանի պահպանությունն իրականացնող հարյուրավոր մեքենաներից բաղկացած շարասյուներն ու ուղղաթիռները մշտապես հայտնվում են հանրային քննարկումների կիզակետում՝ պայմանավորված ոչ միայն աստղաբաշխական ծախսերով, այլև քաղաքներում երթևեկության կաթվածահարմամբ։
Ընդդիմադիր լրատվականներում թեմայի վերաբերյալ տարածվող լուրերում Էրդողանի անվտանգությունն ապահովող թիկնազորն անվանվում է «Անվտանգության բանակ»:
Աղբյուր՝ Kronos Haber
