Թուրքիայի, Պակիստանի և Սաուդյան Արաբիայի միջև ստորագրված «Մեքքայի պաշտպանական համաձայնագիրը» մեծ դժգոհություն և բողոքի ալիք է բարձրացրել Հնդկաստանում։ Հաշվի առնելով Հնդկաստանի և Պակիստանի միջև տասնամյակներ տևող քաղաքական ու ռազմական լարվածությունը՝ Նյու Դելին սկսել է խստորեն քննադատել այս դաշինքը, ինչն իր հերթին հանգեցրել է Թուրքիայի և Սաուդյան Արաբիայի նկատմամբ բոյկոտի կոչերի։
Հնդկական լրատվամիջոցների և սոցիալական հարթակների քարոզչության արդյունքում հնդիկ զբոսաշրջիկները սկսել են զանգվածաբար չեղարկել դեպի Թուրքիա նախապես ամրագրված իրենց ուղևորությունները։ Թեև չեղարկումների հստակ քանակի վերաբերյալ պաշտոնական կամ անկախ վիճակագրություն դեռևս չկա, սակայն տուրիստական գործակալությունները հայտնում են չեղարկման հայտերի անսովոր աճի մասին։ Որոշ լրատվամիջոցներ նույնիսկ նշում են տասնյակ հազարավոր չեղարկումների մասին։
Հնդկաստանը Թուրքիայի զբոսաշրջային ոլորտի համար կարևոր շուկա է համարվում. տարեկան շուրջ 250.000 հնդիկ զբոսաշրջիկ է մեկնում Թուրքիա։ Ստեղծված իրավիճակը կարող է լուրջ հարված հասցնել տուրիզմի ոլորտին, քանի որ հնդկական ԶԼՄ-ները քաղաքացիներին բացահայտ հորդորում է վերանայել իրենց ճամփորդական ծրագրերը՝ որպես պատասխան Պակիստանի հետ Թուրքիայի ռազմական գործակցությանը։
Աղբյուր՝ Turizm Aktüel
