Թուրքիայի ընդդիմադիր «Saadet» (Երջանկություն) կուսակցության ղեկավար Մահմութ Արըքանը հայտարարել է, որ պետք է կանխել Թուրքիայի և Իրանի միջև հնարավոր հակադրությունը՝ զգուշացնելով, որ նման զարգացումը կարող է լինել տարածաշրջանում ստեղծված վտանգավոր ռազմավարական ծուղակ։
«Թուրքիան և Իրանն այս տարածաշրջանի երկու հնագույն պետություններն են։ Մենք ունենք բավականաչափ փորձ ու պետական մտածողություն, որը թույլ կտա պատասխանել այն ներքին և արտաքին ուժերին, որոնք ցանկանում են մեզ իրար դեմ հանել», – գրել է կուսակցապետը սոցիալական կայքում։
Նա նաև նշել է, որ ստեղծվող իրավիճակը միայն ռազմական վտանգ չէ, այլ նաև Թուրքիային տարածաշրջանում թիրախ դարձնելու փորձ։ Նրա խոսքով՝ Թուրքիան չպետք է ընկնի այդ վտանգավոր թակարդի մեջ և չպետք է ներգրավվի անորոշ հետևանքներ ունեցող հակամարտությունների մեջ։
Ընդդիմադիր գործիչը նաև շեշտել է, որ թեև Թուրքիան կարող է դիմակայել ցանկացած սպառնալիքի, այնուամենայնիվ երկիրը չպետք է դառնա տարածաշրջանային պատերազմի կողմ։ Նա կոչ է արել իսլամական երկրներին փոխադարձ հակամարտությունների փոխարեն համատեղ դիմակայել տարածաշրջանի ընդհանուր վտանգներին։
Աղբյուր՝ www.tv5.com.tr
