Հունաստանն ու Թուրքիան վիճում են «իշքեմբե» ապուրի մշակութային պատկանելիության շուրջ

Հունաստանի Սալոնիկ քաղաքի ռեստորանի սեփականատերներից մեկը՝ Դիմիտրիս Ցարոհասը դիմել է ՅՈՒՆԵՍԿՕ-ին «իշքեմբե» կոչվող ապուրը ոչ նյութական մշակութային ժառանգության ցանկում գրանցելու համար։ Նշենք, որ ապուրը պատրաստվում է ոչխարի կամ կովի ստամոքսից։ Թուրքերն ու հույներն այն համարում են իրենց ավանդական ուտեստը։ ՅՈՒՆԵՍԿՕ դիմելուց հետո ապուրի հետ կապված լարվածությունը թեժացել է երկրների միջև։

Նշենք, որ հույների մոտ «իշքեմբե» ապուրը հայտնի է «պացա» անունով և նրանք պնդում են, որ ապուրի մասին հիշատակումները հանդիպում են Հոմերոսի «Ոդիսական» պոեմում։ Իսկ թուրքական ռեստորանատեր Ալի Թուրքմենն էլ նշել է, որ հույները նույն կերպ են գործում ինչպես դա արեցին փախլավայի դեպքում։ Ըստ նրա՝ հույներն այդ ապուրն էլ են ուզում սեփականաշնորհել, բայց իշքեմբեն յուրահատուկ բան է թուրքերի համար։

Թուրքական լրատվամիջոցները նույնպես մեղադրում են հարևան երկրին ուտեստը «սեփականացնելու» մեջ։ Թուրքերն էլ իրենց հերթին են նշում, որ «իշքեմբե» ապուրի մասին հիշատակումներ կան պահպանված Էվլիյա Չելեբիի «Սեյահաթնամեում» (Ուղեգրությունում), որտեղ նշվում է, որ այդ ուտեստն իրենց երկրում ունի առնվազն 400 տարվա պատմություն։

Թուրքական լրատվամիջոցները նշում են, որ նման «խոհանոցային» պայքար եղել է նաև թուրքական սուրճի և հունական սուրճի, յոգուրտի, ջաջըքի ու ձաձիկի, թփով տոլմայի և փախլավայի դեպքում։

Աղբյուր՝ Diken