Իրանին տնտեսապես մեկուսացնելու արշավում ԱՄՆ ֆինանսների նախարար Սքոթ Բեսենթն առանձնացրել է Թուրքիայի գործոնը։ Նախարարը շեշտել է, որ տարբեր երկրների հետ տարվող աշխատանքները սկսել են արդյունք տալ՝ որպես օրինակ նշելով Թուրքիայում ավիացիայի և բանկային ոլորտներում ձեռնարկված քայլերը։
Թուրքիան և Օմանը դադարեցրել են իրանական մասնավոր «Mahan Air» ավիաընկերության թռիչքները դեպի իրենց երկրներ։ Բեսենթը նաև պնդել է, որ Թուրքիայի և Միացյալ Արաբական Էմիրությունների խոշոր առևտրային բանկերը դադարեցրել են Իրանի հետ որոշ գործարքներ։
ԱՄՆ ֆինանսների նախարարությունը սեպտեմբերի 8-ին Իրանի ավիացիոն ոլորտի դեմ պատժամիջոցների լայն փաթեթ էր կազմել, որի ցանկում ներառվել էին նաև Թուրքիայում գործող 3 ընկերություններ։ Վաշինգտոնը պնդել էր, որ այդ ընկերությունները տարբեր ոլորտներում աջակցություն են ցուցաբերել «Mahan Air»-ին։
Այնուհետև «Mahan Air»-ը հայտարարել էր, որ սեպտեմբերի 21-ից մինչև հետագա ծանուցումը դադարեցնում է իր չվերթները դեպի Ստամբուլ և Անկարա։ Վաշինգտոնը նախկինում պատժամիջոցների գործընթացում ներառել էր նաև Թուրքիայում գործող ֆինանսական և լոգիստիկ ընկերություններ, որոնք, ըստ ԱՄՆ-ի, կապեր են ունեցել Իրանի հետ։
Իսկ բանկային ոլորտում էլ Թուրքիայի Բանկային կարգավորման և վերահսկողության գործակալությունը (BDDK) չեղարկել է Իրանում գործող «Bank Mellat»-ի Ստամբուլի կենտրոնական մասնաճյուղի գործունեության թույլտվությունը։
Բեսենթը հայտարարել է, որ արշավը շարունակվելու է՝ նշելով, որ նպատակ կա ավելի սահմանափակել Իրանի միջազգային տնտեսական կապերը։
Աղբյուր՝ Dunya
