Թուրքիայի առաջատար տեխնոլոգիական և ռազմարդյունաբերական «ASELSAN» ընկերությունը, որը ստեղծվել է Թուրքիայի նկատմամբ ռազմական ոլորտում կիրառված սահամանափակումներին արձագանքելու նպատակով, նշում է հիմնադրման 50-րդ տարին:
1975-ի նոյեմբերի 14-ին հիմնադրված «ASELSAN»-ի հոբելյանին նվիրված նոր գովազդային տեսանյութում ներկայացվում է ընկերության ստեղծման պատմությունը: Դրանում ասվում է, որ 1974-ի «Կիպրոսի խաղաղության» գործողության ժամանակ արտաքին կախվածության հետևանքով առաջացած կապի խնդիրները և դրանցից հետո ազգային համակարգերի ստեղծման անհրաժեշտությունը դարձան «ASELSAN»-ի ձևավորման հիմնական պատճառը։
Գովազդային հոլովակում ներկայացվում է նաև Թուրքիայի առաջին ազգային ռադիոկապի մշակման ճանապարհը և «ASELSAN»-ի կեսդարյա տեխնոլոգիական անկախության ուղին։ Հոլովակում նաև մատնանշվում է թուրքական ռազմարդյունաբերության տեխնոլոգիական առաջընթացը:
Հոլովակի դրվագներից մեկում էլ նկարագրված է Կիպրոսի գործողությունների ընթացքում ծառայող թուրք զինվորի երազանքը՝ ապագա այն օրերի մասին, երբ Թուրքիան կհասնի լիակատար տեխնոլոգիական անկախության։ Դրանում այդ երազանքը ներկայացվում է որպես խորհրդանշական ճանապարհ: Նշվում է, որ «ASELSAN»-ը շարունակում է իր գործունեությունը՝ նպատակ ունենալով իրականացնել Թուրքիայի «լիակատար տեխնոլոգիական անկախության» տեսլականը:
Նշենք, որ ընկերությունն այժմ հայտնի է ավելի քան 700 արտադրատեսակով, տեղական ազգային ռադիոկապի արդատրությամբ և «Երկաթե գմբեթ» (ÇELİKKUBBE) ռազմաօդային պաշտպանական համակարգի մշակմամբ:
Աղբյուր՝ Asi Gazetesi
