Ի՞նչ հարցեր են քննարկել հայ և թուրք նախարարները

Թուրքիայի գյուղատնտեսության և անտառտնտեսության նախարար Իբրահիմ Յումաքլըն Ստամբուլում հանդիպել է Հայաստանի էկոնոմիկայի նախարար Գևորգ Պապոյանի հետ։ Նշենք, որ Պապոյանը Ստամբուլում մասնակցում էր “Zero Waste Forum” («Զրոյական թափոններ») համաշխարհային համաժողովին։

Յումաքլըն նշել է, որ Պապոյանի հետ քննարկել են սննդի և ջրի վատնման տնտեսական ծախսերի, մատակարարման շղթայի կորուստների և արտադրության արդյունավետության վերաբերյալ հարցեր։

«Ռեսուրսների պահպանման և տնտեսական արդյունավետության բարձրացման համար վճռական ենք ամրապնդելու մեր համագործակցությունը»,- նշել է Յումաքլըն։

Հանդիպման վերաբերյալ Պապոյանը նշել է, որ երկուստեք կարևորել են Հայաստան-Թուրքիա կանոնավոր շփումները և վերահաստատել երկխոսությունը շարունակելու պատրաստակամությունը։ Քննարկել են Կարս–Գյումրի երկաթուղային հաղորդակցության վերաբացման հնարավորությունները, TRIP ծրագրի միջոցով առաջացող տնտեսական, լոգիստիկ և առևտրային նոր հնարավորությունները երկու երկրների համար։

Հայակական կողմի տարածած հաղորդագրության մեջ նշվել է, որ նախարարներն անդրադարձել են նաև շուկաների դիվերսիֆիկացման, լոգիստիկ նոր ուղիների ձևավորման, փոխադարձ տնտեսական հետաքրքրությունների ընդլայնման հնարավորություններին։ Քննարկվել են նաև գյուղատնտեսության ոլորտում համագործակցության վերաբերյալ հարցեր, որոնք առնչվում են գյուղապահովագրության, կարկտահարության և կենդանիների հիվանդությունների դեմ համատեղ պայքարին։

Աղբյուր՝ https://x.com/ibrahimyumakli/status/1994700670226595846?s=20, Ermenihaber.am