Թուրքիայի արտաքին գործերի նախարար Հաքան Ֆիդանը հայտարարել է, որ Անկարան դեմ է Իրանի նկատմամբ հնարավոր ռազմական միջամտությանը և Իրանն ինքը պետք է լուծի երկրում առկա իրական խնդիրները: Այդ մասին նա ասել է Ստամբուլում լրագրողների հետ հանդիպման ընթացքում՝ պատասխանելով Իրանում առկա լարվածության վերաբերյալ հարցերին։
Լրագրողի այն հարցին, թե արդյոք Թուրքիան սպասում է ԱՄՆ-ի կողմից Իրանի դեմ ռազմական օպերացիայի, Ֆիդանը նշել է, որ զարգացումներին շատ ուշադիր հետևում են և հույս հայտնել, որ ԱՄՆ-ն ու Իրանը կկարողանան լուծել խնդիրները ուղիղ երկխոսության, միջնորդների կամ այլ դերակատարների միջոցով։
Նրա խոսքով՝ Իրանում տեղի ունեցող ցանկացած լայնածավալ ապակայունացում կարող է ունենալ ծանր հետևանքներ ողջ տարածաշրջանի համար, ինչը «տարածաշրջանի դիմադրողականությունից վեր է»։
Ֆիդանը հիշեցրել է նաև, որ Իրանը Թուրքիայի հարևանն է և երկու երկրների ժողովուրդների միջև կան խորը առևտրային ու սոցիալական կապեր։
Աղբյուր՝ CNN Türk
