Լիբիայում 17 տարվա դադարից հետո հայտարարված նավթի և գազի որոնման ու շահագործման մրցույթում Թուրքիայի նավթային բաժնետիրական ընկերությունը (TPAO) հաղթել է երկու հանքավայրի համար՝ մեկը ծովային, մյուսը՝ ցամաքային։
Մրցույթի արդյունքների հրապարակման արարողությանը մասնակցել են Լիբիայի վարչապետ Աբդուլհամիդ Դբեյբեն, նավթի և գազի նախարար Խալիֆա Աբդուսսադիկը, Լիբիայի Ազգային նավթային կորպորացիայի նախագահ Մեսուդ Սուլեյմանը, ինչպես նաև մի շարք միջազգային էներգետիկ ընկերությունների ներկայացուցիչներ։
Լիբիայի Ազգային նավթային կորպորացիային կից մրցութային հանձնաժողովը հայտնել է, որ Թուրքիայի նավթային բաժնետիրական ընկերությունը Իսպանիայի «Repsol» ընկերության հետ համատեղ շահել է C3 ցամաքային բլոկը։ Նույն գործընկերությամբ, ինչպես նաև Հունգարիայում գրանցված «MOL» ընկերության մասնակցությամբ, թուրքական կողմը ձեռք է բերել նաև O7 ծովային բլոկի շահագործման իրավունքը։
Լիբիայի նավթի և գազի նախարարությունը նախորդ տարի հայտարարել էր, որ 17 տարվա ընդմիջումից հետո կրկին մրցույթ է կազմակերպում՝ ընդհանուր 22 բլոկի համար, որոնցից 11-ը՝ ցամաքային, 11-ը՝ ծովային։
Աղբյուր՝ TRT Haber
