Թուրքիայի փոխնախագահ. Սերբիան կարևոր դեր ունի Բալկանների կայունության համար

Թուրքիայի փոխնախագահ Ջևդեթ Յըլմազը հայտարարել է, որ Անկարան Սերբիան դիտարկում է որպես Բալկանների կայունության համար առանցքային երկիր և վստահ է, որ երկու երկրների հարաբերությունները դրական ազդեցություն կունենան ողջ բալկանյան տարածաշրջանի համար։

Յըլմազը, մասնակցելով Սերբիայի ազգային օրվա և զինված ուժերի օրվա կապակցությամբ կազմակերպված ընդունելությանը, նշել է, որ Թուրքիան կարևորում է երկկողմ հարաբերությունների զարգացումը բոլոր ոլորտներում։ Նրա խոսքով՝ 2025-ին երկրների միջև առևտրաշրջանառությունը հասել է 3.4 միլիարդ դոլարի, իսկ նպատակն այն 5 միլիարդ դոլարի հասցնելն է։

Նա նաև հայտնել է, որ թուրքական շինարարական ընկերությունները Սերբիայում իրականացրել են շուրջ 2 միլիարդ դոլարի ծրագրեր։

Յըլմազի խոսքով՝ վերջին երկու տարիներին Սերբիա այցելած ամենաշատ օտարերկրյա զբոսաշրջիկները Թուրքիայի քաղաքացիներն են եղել, իսկ սերբ զբոսաշրջիկների նախընտրելի ուղղությունների շարքում Թուրքիան զբաղեցնում է 2-րդ տեղը։

Աղբյուր՝ Trt Haber