Ստամբուլի Բաքըրքյոյի հանրապետական դատախազությունը հետաքննություն է սկսել մի շարք օգտատերերի նկատմամբ, ովքեր լուրեր են տարածել, թե իբր արգելվել է կալանավորված Ստամբուլի նախկին քաղաքապետ Էքրեմ Իմամօղլուի հանդիպումը պատգամավորների հետ:
Թուրքիայի գլխավոր ընդդիմադիր ուժը համարվող «Ժողովրդահանրապետական» կուսակցության (ԺՀԿ-CHP) անդամ ընդդիմադիր գործչի շուրջ ստեղծված իրավիճակի վերաբերյալ դատախազությունը հանդես է եկել պաշտոնական հայտարարությամբ:
Հայտարարվել է, որ սոցցանցերում շրջանառվող տեղեկությունները չեն համապատասխանում իրականությանը: Ըստ հաղորդագրության՝ քրեակատարողական հիմնարկներում գտնվող բոլոր կալանավորվածների և դատապարտվածների տեսակցության իրավունքներն ապահովվում են օրենսդրության շրջանակներում՝ առանց բացառությունների:
Նշվել է նաև, որ կեղծ տեղեկություններ տարածած սոցիալական մեդիայի հաշիվների օգտատերերի նկատմամբ հետաքննություն է սկսվել Թուրքիայի քրեական օրենսգրքի համապատասխան հոդվածի հատկանիշներով (հանրությանը ակնհայտ կեղծ տեղեկատվության տրամադրում/ապատեղեկատվություն):
Աղբյուր՝ Kronos
