Թուրքիայի փոխնախագահ Ջևդեթ Յըլմազը հայտարարել է, որ կառավարությունը մտադիր է պարենային գնաճը (ինֆլյացիան) զսպել գյուղատնտեսությանն աջակցելու միջոցով։
Սամսուն քաղաք կատարած այցի շրջանակներում, իշխող «Արդարություն և զարգացում» կուսակցության (ԱԶԿ-AKP) նիստի ժամանակ, Յըլմազն անդրադարձել է երկրի տնտեսական ցուցանիշներին և սպասվող ծրագրերին:
Թուրքիայի փոխնախագահն ընդգծել է, որ գնաճի դեմ պայքարը չի սահմանափակվելու միայն դրամավարկային և հարկաբյուջետային քաղաքականությամբ: Ի տարբերություն նախորդ տարվա երաշտի և ցրտահարությունների, այս տարի Թուրքիայում արձանագրվել են առատ տեղումներ, ինչի շնորհիվ ակնկալվում է վերջին տարիների ամենաբարձր բերքատվությունը:
Ըստ Յըլմազի՝ գյուղատնտեսության ու ոռոգման համակարգերի աջակցությունը կհանգեցնի ամռանը սննդամթերքի գների նվազմանը և պարենային գնաճի կայունացմանը:
Աղբյուր՝ Anadolu
