Թուրքիայի Ռեջեփ Թայիփ Էրդողանի անվան համալսարանը (RTEÜ) հայտարարել է, որ հետաքննություն է սկսել համալսարանի դասախոս, պրոֆեսոր Յավուզ Քյոքթաշի նկատմամբ, որը Թուրքիան անվանել է «անհավատների երկիր» (գյավուր, քյաֆիր)։
Իսլամագիտության ֆակուլտետի Իսլամի հիմնարար գիտությունների բաժնում աշխատող Քյոքթաշը սոցիալական ցանցում գրել էր․
«Նախկինում կարծում էի, որ Թուրքիան, թեև իսլամական պետություն չէ, այնուամենայնիվ իսլամական երկիր է։ Սակայն այսօր Ռիզեի փողոցներում տեսածից հետո համոզվեցի, որ սա ոչ թե իսլամական, այլ անհավատների երկիր է։ Ինչպիսին Ամերիկան է, այդպիսին էլ Թուրքիան է։ Մինարեթներից ազանի հնչելը իրավիճակը չի փոխում»։
RTEÜ-ի ռեկտորատը հայտնել է, որ Քյոքթաշի հրապարակման առնչությամբ հետաքննություն է սկսվել՝ ընդգծելով, որ նրա գրառումն արտահայտում է միայն դասախոսի անձնական տեսակետներն ու գնահատականները և չի ներկայացնում համալսարանի պաշտոնական դիրքորոշումը։
Համալսարանը նշել է, որ հասարակական միասնությունը, փոխադարձ հարգանքը և տարբերությունների նկատմամբ ներառական մոտեցումն իր հիմնարար արժեքներից են, և որ համալսարանը դեմ է ցանկացած պառակտող ու օտարող խոսույթի։
Քյոքթաշը պարզաբանելով իր գրառումը, գրել է, որ իր հրապարակումն արտահայտում է միայն անձնական կարծիք։ Նա նշել է, որ «անհավատ» բառը կիրառելով՝ նկատի չի ունեցել կրոնից հեռանալը, այլ՝ «կրոնից որոշակի առումով հեռացումը» և հատկապես հասարակության մեջ նկատվող մերկացման միտումները, որոնցից, նրա խոսքով, «գրեթե բոլոր խելամիտ կանայք դժգոհ են»։
Միաժամանակ նա ընդունել է, որ իր արտահայտությունը դուրս է եկել իր նպատակադրած իմաստի շրջանակից և կարող էր սխալ ընկալվել՝ հավելելով․ «Ցավում եմ»։
Աղբյուր՝ Diken
