Ստամբուլի նախկին քաղաքապետ Էքրեմ Իմամօղլուն դատապարտվել է 2 տարի 1 ամիս ազատազրկման՝ Թուզլայի նախկին քաղաքապետ Շադի Յազըջըին վիրավորելու մեղադրանքով։ Իմամօղլուին արգելվել է զբաղվել քաղաքական գործունեությամբ։
Դատարանն նրան մեղավոր է ճանաչել պաշտոնատար անձին հրապարակայնորեն վիրավորելու հոդվածով և սկզբում սահմանել 2 տարի 6 ամիս ազատազրկում, որը պատժի մեղմացման արդյունքում կրճատվել է մինչև 2 տարի 1 ամիս։ Բացի այդ, դատարանի վճռով Իմամօղլուն զրկվել է որոշակի իրավունքների իրականացումից՝ ներառյալ ընտրելու, ընտրվելու, պետական ու համայնքային պաշտոններ զբաղեցնելու և քաղաքական կուսակցություններում ղեկավար դեր ստանձնելու իրավունքը:
Դատական նիստի ընթացքում Իմամօղլուն հերքել է մեղադրանքը՝ հայտարարելով, որ իր խոսքերը վիրավորելու միտում չեն ունեցել, այլ եղել են քաղաքական քննադատություն և արձագանք՝ Թուզլայի կայանի բացման ժամանակ տեղի ունեցած միջադեպին։
Աղբյուր՝ Anadolu
