Թուրքիայի առևտրի նախարարությունը տվյալներ է հրապարակել 2026-ի 1-ին կեսին արտաքին առևտրի և ներդրումային միջավայրի ընդլայնմանն ուղղված աշխատանքների մասին։ Ըստ այդմ՝ 6 ամսում թուրքական կողմը 57 երկրի հետ իրականացրել է 152 բարձրաստիճան հանդիպում՝ նպատակ ունենալով դուրս գալ նոր շուկաներ և ամրապնդել դիրքերը գլոբալ առևտրային ցանցում։
Նշվել է, որ ակտիվորեն գործարկվել են ազատ առևտրի (STA), արտոնյալ առևտրի (TTA) համաձայնագրերի, ինչպես նաև համատեղ տնտեսական և առևտրային հանձնաժողովների (JETCO/KEK) ձևաչափերը։
Մասնավորապես Անկարայում կայացել է Մեծ Բրիտանիայի հետ գործող համաձայնագրի արդիականացման բանակցությունների 5-րդ փուլը։ Համաձայնություն է ձեռք բերվել Կանադայի և Կոստա Ռիկայի հետ «STA» բանակցություններ սկսելու շուրջ, իսկ Ադրբեջանի և Ուզբեկստանի հետ ընդլայնվել են Արտոնյալ առևտրի (TTA) շրջանակները։
Երկկողմ հանդիպումներ են անցկացվել Սաուդյան Արաբիայի, Թուրքմենստանի, Ղազախստանի, Ուզբեկստանի, Ադրբեջանի, Սերբիայի, Կոսովոյի, Հյուսիսային Մակեդոնիայի, ԱՄԷ-ի, Իրաքի, Իրանի, Քաթարի, Քուվեյթի, Օմանի և Սիրիայի ներկայացուցիչների հետ։
Մեծ Բրիտանիայի հետ ստորագրվել է «Լիազորված տնտեսական օպերատորների փոխադարձ ճանաչման» համաձայնագիր, Հունգարիայի հետ հեշտացվել են տարանցիկ փոխադրումների և վիզաների տրամադրման պայմանները, իսկ Սիրիայի հետ ստորագրվել է էներգետիկայից մինչև բանկային ու շինարարական ոլորտներն ընդգրկող լայնածավալ արձանագրություն։
Հորմուզի նեղուցում տեղի ունեցող զարգացումների ֆոնին թուրքական կողմը հատուկ ուշադրություն է դարձրել տարածաշրջանի երկրների հետ այլընտրանքային առևտրային երթուղիների, լոգիստիկայի և մատակարարման շղթաների ամրապնդմանը։
Թուրքիայի առևտրի նախարարությունը մտադիր է առևտրային դիվանագիտության ակտիվ քաղաքականությունը շարունակել նաև տարվա 2-րդ կեսին։
Աղբյուր՝ Trt Haber
