Եվրոպական միության վիճակագրական ծառայությունը (Eurostat) հրապարակել է Եվրամիության (ԵՄ)՝ 2026 թվականի երկրորդ եռամսյակի միջազգային առևտրի վերաբերյալ տվյալները։
Ըստ տվյալների՝ ԵՄ-ն նշված ժամանակահատվածում Միությունից դուրս գտնվող երկրներից ներմուծել է 701․8 միլիարդ եվրոյի ապրանք, իսկ այդ երկրներ արտահանել՝ 680 միլիարդ եվրոյի ապրանք։
Այս ժամանակահատվածում ԵՄ-ի ներմուծումը նախորդ տարվա նույն ժամանակահատվածի համեմատ աճել է 11․7 տոկոսով, իսկ արտահանումը՝ 4․5 տոկոսով։
ԵՄ-ի կողմից ամենաշատ ներմուծում իրականացվել է Չինաստանից՝ 153․6 միլիարդ եվրոյի չափով, որը կազմել է ընդհանուր ներմուծման 21․9 տոկոսը։ Չինաստանին հաջորդել են ԱՄՆ-ը՝ 98․7 միլիարդ եվրո, Մեծ Բրիտանիան՝ 43․4 միլիարդ եվրո, և Շվեյցարիան՝ 36․9 միլիարդ եվրո։
ԵՄ-ի կողմից Թուրքիայից ներմուծումը երկրորդ եռամսյակում կազմել է 25․5 միլիարդ եվրո։ Այսպիսով, Թուրքիան դարձել է ԵՄ-ի կողմից ամենաշատ ներմուծում իրականացվող 5-րդ երկիրը։
Միևնույն ժամանակ, ԵՄ-ի կողմից ամենաշատ արտահանում իրականացվել է ԱՄՆ՝ 127․7 միլիարդ եվրոյի չափով։ ԱՄՆ-ին հաջորդել են Մեծ Բրիտանիան՝ 92․7 միլիարդ եվրո, Շվեյցարիան՝ 60․5 միլիարդ եվրո, և Չինաստանը՝ 50․3 միլիարդ եվրո։
ԵՄ-ի արտահանումը Թուրքիա կազմել է 27․3 միլիարդ եվրո։ Այս ցուցանիշով ևս Թուրքիան զբաղեցրել է 5-րդ տեղը ԵՄ-ի արտահանման հիմնական ուղղությունների շարքում։
Այսպիսով, Թուրքիայի և ԵՄ-ի միջև առևտրաշրջանառության ընդհանուր ծավալը երկրորդ եռամսյակում հասել է 52․8 միլիարդ եվրոյի։
Աղբյուր՝ Ermenihaber.am
