Թուրքիան և Կանադան ատոմային էներգիայի համագործակցության համաձայնագիր են ստորագրել

Թուրքիան և Կանադան համաձայնագիր են ստորագրել «CANDU» ռեակտորային առաջադեմ  տեխնոլոգիայով ատոմակայանի կառուցման հնարավորությունն ուսումնասիրելու և նախագծի նախնական ինժեներական աշխատանքներն իրականացնելու վերաբերյալ։

Համաձայնագիրը ստորագրվել է Անթալիայում անցկացվող ՄԱԿ-ի Կլիմայի փոփոխության մասին շրջանակային կոնվենցիայի կողմերի 31-րդ համաժողովի (COP31) շրջանակում։ Այն կնքել են «Թուրքիայի ատոմային էներգետիկայի կորպորացիան» (TÜNAŞ) և կանադական «AtkinsRéalis» ընկերության դուստր ձեռնարկությունը՝ «Candu Energy Inc.»-ը։

Համաձայնագրով նախատեսվում է գնահատել հնարավոր ատոմակայանի կառուցման վայրը, «CANDU» ռեակտորային տեխնոլոգիայի կիրառման հնարավորությունները, կայանի շահագործման, ֆինանսավորման և տնտեսական արդյունավետության հարցերը։

Թուրքիայի էներգետիկայի ու բնական պաշարների նախարար  Ալփարսլան Բայրաքթարի խոսքով՝ այս քայլը կնպաստի Թուրքիայի միջուկային էներգետիկայի երկարաժամկետ ծրագրերի հստակեցմանը և էներգամատակարարման անվտանգության ամրապնդմանը։

Հիշեցնենք, որ Թուրքիան միջուկային էներգետիկայի ոլորտում համագործակցում է նաև Ռուսաստանի հետ։ Մերսինի Աքքույու ատոմակայանը կառուցվում է ռուսական «Ռոսատոմ»-ի մասնակցությամբ։

Աղբյուր՝ Anadolu, Bigpara