Թուրքիայի արտաքին գործերի նախարար Հաքան Ֆիդանը հարցազրույց է տվել «JTBC» հեռուստաընկերությանը Հարավային Կորեա կատարած այցի ժամանակ։ Նա խոսել է երկկողմ հարաբերությունների վերաբերյալ և ընդգծել, որ Թուրքիան և Հարավային Կորեան դաշնակիցներ են Կորեական պատերազմից ի վեր։
Ֆիդանը հայտնել է, որ երկկողմ համագործակցությունը 2012 թվականին բարձրացվել է ռազմավարական մակարդակի ու կողմերն ունեն ռազմավարական համագործակցության մեխանիզմ ինստիտուցիոնալ առումով։ Անդրադառնալով ԱՄՆ-ի և Իրանի միջև ընթացող բանակցություններին՝ Ֆիդանը նշել է․
«Մենք շուտով կարող ենք լավ լուրեր ստանալ ԱՄՆ-Իրան հարաբերությունների վերաբերյալ»։
Խոսելով Հորմուզի նեղուցի բացման կարևորության մասին՝ Ֆիդանը նշել է, որ ԱՄՆ-ի և Իրանի միջև բանակցություններն ավանդաբար քննարկվել են միջուկային հարցերի շուրջ։ Ստեղծված իրավիճակի պատճառով առաջին անգամ մեկ այլ հարց ավելի հրատապ է դարձել և ավելի կարևոր տեղ է գրավել, քան միջուկայինի վերաբերյալ հարցերը։ Դա Հորմուզի նեղուցում ստեղծված իրավիճակն է և, եթե Հորմուզի նեղուցը ևս մի քանի ամիս փակ մնա, որոշ տեղեկությունների համաձայն, Աֆրիկայի որոշ երկրներ իրականում կբախվեն սննդի պակասի հետ։ Արդյունքում, սա համաշխարհային մղձավանջ է բոլորի համար»։
Աղբյուր՝ TRT Haber
