Թուրքիայի Յալովա նահանգում «Իսլամական պետություն» (ԻՊ – DEAŞ) ահաբեկչական կազմակերպության դեմ իրականացված հատուկ գործողության ընթացքում զինված դիմադրություն է ցուցաբերվել ոստիկանությանը։ Տեղի ունեցած փոխհրաձգության հետևանքով վիրավորվել է 7 ոստիկան։ Վերջիններս տեղափոխվել են հիվանդանոց, նրանց առողջական վիճակը գնահատվում է բավարար։
Ըստ թուրքական աղբյուրների՝ գործողությունը իրականացվել է Յալովայի նահանգային ոստիկանության կողմից՝ նահանգի կենտրոնին ենթակա Էլմալըք գյուղ տանող ճանապարհին գտնվող բնակելի տներից մեկում։ Գործողության ընթացքում կասկածյալները կրակ են բացել իրավապահների ուղղությամբ, ինչի արդյունքում առաջացել է փոխհրաձգություն։
Գործողությանը աջակցություն են ցուցաբերել նաև Բուրսայից ժամանած հատուկ նշանակության ոստիկանության ստորաբաժանումները։ Տարածքում ձեռնարկվել են անվտանգային միջոցառումներ, գործողությունը դեռևս շարունակվում է։
Յալովայի նահանգապետարանը հայտնել է, որ փոխհրաձգության տարածքում գտնվող 5 դպրոցում դեկտեմբերի դասերը ժամանակավորապես դադարեցվել են։ Բացի այդ, անվտանգության նկատառումներից ելնելով՝ տարածքում անջատվել են էլեկտրականությունն ու գազամատակարարումը, իսկ քաղաքացիական անձանց և տրանսպորտային միջոցների մուտքը արգելվել է։
«Թուրքիայի Ռադիոյի և հեռուստատեսության գերագույն խորհուրդ»-ն էլ (RTÜK) հայտարարել է Յալովայում տեղի ունեցած դեպքի վերաբերյալ ժամանակավոր հրապարակումների արգելքի մասին։ «RTÜK»-ի հայտարարության համաձայն՝ մեդիա հարթակները պարտավոր են սահմանափակվել բացառապես պաշտոնական մարմինների տարածած տեղեկատվությամբ և զերծ մնալ չհաստատված տեղեկությունների հրապարակումից։
Աղբյուր՝ Trt Haber
