Էրդողանի ուղերձը մուսուլման ամերիկացիների միության համագումարին

Թուրքիայի նախագահ Ռեջեփ Թայիփ Էրդողանը գրավոր ուղերձ է հղել ԱՄՆ-ում անցկացվող «Մուսուլման ամերիկացիների միության» (Muslim American Society) տարեկան համագումարին։

Համագումարը այս տարի անցկացվել է «Կրակի տակ հավատքը․ ուժեղ մնալ քաոսային ժամանակներում» խորագրով։ Իր ուղերձում Էրդողանն անդրադարձել է աշխարհում շարունակվող պատերազմներին, ճգնաժամերին ու անկայունությանը՝ ընդգծելով, որ նման պայմաններում դժվարությունները հնարավոր է հաղթահարել փոխադարձ հավատով և ամուր դիրքորոշմամբ։

Նրա խոսքով՝ ամերիկա-մուսուլմանական համայնքի ձեռնարկած քայլերն ու ցուցաբերած սկզբունքային դիրքորոշումը արժանի են բարձր գնահատանքի։ Էրդողանը նաև հույս է հայտնել, որ այդ «արժեքային կեցվածքը» կարող է օրինակ ծառայել այլ հասարակությունների համար և նպաստել գլոբալ գիտակցման ձևավորմանը։

Նշվում է, որ համագումարին որպես գլխավոր բանախոս մասնակցել է Թուրքիայի իշխող «Արդարություն և զարգացում» կուսակցության (ԱԶԿ-AKP) կանանց թևի նախագահ Թուղբա Ըշըք Էրջանը, ով նաև ընթերցել է Էրդողանի ուղերձը։

Աղբյուր՝ Trt Haber