Թուրքական պետական «Halkbank» բանկը հայտնել է, որ ԱՄՆ-ում 2019 թվականից շարունակվող քրեական գործը նախատեսվում է ավարտել համաձայնության միջոցով։
Բանկի հայտարարության համաձայն՝ ԱՄՆ արդարադատության նախարարության Նյու Յորքի հարավային շրջանի դատախազության հետ ձեռք է բերվել «հետապնդման հետաձգման համաձայնագիր» (Deferred Prosecution Agreement)։ Այս համաձայնության շրջանակում «Halkbank»-ը չի ընդունում որևէ քրեական մեղադրանք և չի վճարելու որևէ տուգանք։
Պայմանավորվածության համաձայն՝ բանկը պետք է ներկայացնի համապատասխանության վերաբերյալ անկախ փորձագիտական զեկույց ԱՄՆ ֆինանսների նախարարության օտարերկրյա ակտիվների վերահսկման գրասենյակին (OFAC) և դատախազությանը։ Դրանից հետո կողմերը համատեղ դիմելու են դատարան՝ գործը փակելու համար։
Եթե դատարանը հաստատի համաձայնությունը, ապա շուրջ ինը տարի շարունակվող դատական գործընթացը ԱՄՆ-ում պաշտոնապես կավարտվի։
Աղբյուր՝ Haber Global
