Թուրքիայում կանանց սպանությունների աճը մտահոգիչ ցուցանիշների է հասել

Թուրքիայի խորհրդարանում քննարկվում է կանանց նկատմամբ բռնությունների և սպանությունների կտրուկ աճը։ Պատգամավոր Սևիլայ Չելենքը նկատել է տվել, որ «Ստամբուլյան կոնվենցիայից» Թուրքիայի դուրս գալուց հետո երկրում տղամարդկանց բռնի արարքներն ավելի են լեգիտիմացել, իսկ կանայք ավելի հաճախ են դառնում դաժան հանցագործությունների զոհ։

Չելենքը հղում է արել Bianet-ի տվյալներին՝ նշելով, որ միայն 2025 թվականի սեպտեմբերին տղամարդիկ սպանել են առնվազն 24 կին և 9 երեխա։ Վերջին հինգ տարվա վիճակագրությունը ցույց է տալիս, որ 2021-ին սպանվել է 131 կին, 2022-ին՝ 164, 2023-ին՝ 147, 2024-ին՝ 205, իսկ 2025-ին՝ արդեն 136 կին։

Պատգամավորը շեշտել է, որ այդ թվերը վկայում են կանանց կյանքի իրավունքը երաշխավորող արդյունավետ մեխանիզմների անհապաղ անհրաժեշտության մասին։ Ըստ նրա՝ տղամարդկանց կողմից կանանց սպանությունները ոչ միայն չեն նվազում, այլև գնալով աճում են՝ ընդգծելով պետական պատասխանատվության և օրենսդրական գործողությունների հրատապությունը։

Աղբյուր՝ t24