Հունաստանը դեմ է Ֆրանսիա-Թուրքիա ռազմական մերձեցմանը

Թուրքիայի և Ֆրանսիայի միջև ռազմական ոլորտում հնարավոր համագործակցության վերաբերյալ լուրերը լայն արձագանք են ստացել հունական մամուլում։ Հունաստանում տարակուսանքով ու խիստ քննադատությամբ են հետևում Փարիզի և Անկարայի միջև ընթացող բանակցություններին՝ դրանք որակելով որպես «մեծ դավաճանություն»։

Հունական կողմի մտահոգության պատճառը Թուրքիայի «Պողպատե գմբեթ» (Çelik Kubbe ) հակաօդային պաշտպանության (ՀՕՊ) բազմաշերտ համակարգին ֆրանս-իտալական արտադրության SAMP/T հրթիռների հնարավոր ինտեգրմանն ուղղված նախապատրաստական աշխատանքներն են։

Հունական առաջատար լրատվամիջոցները շեշտում են, որ գործարքի իրականացման դեպքում էականորեն կհզորանա Թուրքիայի հակաօդային պաշտպանության կարողությունը և ուղղակիորեն կփոխվի Էգեյան ծովում և Արևելյան Միջերկրականում առկա ռազմական հավասարակշռությունը հօգուտ Անկարայի։

Աթենքում վերլուծաբանները նշում են, որ Ֆրանսիայի այդ քայլը հարցականի տակ է դնում Աթենք-Փարիզ առկա ռազմաքաղաքական դաշինքն ու համագործակցությունը։ Թուրքական մամուլում ուշագրավ է համարվում այն, որ Թուրքիա-Ֆրանսիա ռազմական շփումների ակտիվացումը համընկնում է ՆԱՏՕ-ի առաջիկա գագաթնաժողովի հետ:

Աղբյուր՝ Yeni Şafak