Թուրքիայի արտգործնախարար Հաքան Ֆիդանը մեկնել է Սաուիդան Արաբիա՝ մասնակցելու «Թուրք-սաուդական համակարգող խորհրդի 2-րդ նիստին»: Այցի շրջանակներում նա հանդիպել է Սաուդիան Արաբիայի արտգործնախարար Ֆայսալ Բին Ֆերհան Ալ-Սաուդի հետ:
Մայիսի 18-ին կայացած նիստի ընթացքում Ալ-Սաուդին անդրադարձել է երկու երկրների միջև առկա հարաբերություններին և համագործակցությանը:
Ֆիդանն էլ գոհունակություն է հայտնել հարաբերությունների կարգավիճակից՝ դրանք որակելով որպես սերտ և անկեղծ: Բացի այդ Թուրքիայի արտգործնախարարը երկու երկրներին անվանել է տարածաշրջանում և իսլամական աշխարհում «կարևոր դերակատարներ»:
«Մենք գոհ ենք մեր ղեկավարների կողմից առաջ քաշված տեսլականի հիման վրա ձեռք բերված առաջխաղացումից»,- ասել է Ֆիդանը։
Վերջինս մեծ կարևորություն է տվել Սաուդիան Արաբիայի հետ համագործակցության ու համակարգման ավելի ու ավելի ամրապնդմանը։ Հիշեցրել է, որ 2024-ին երկու երկրների միջև առևտրաշրջանառության ծավալը կազմել է 8 մլրդ դոլար:
«Մենք ցանկանում ենք այս տարի հասնել 10 մլրդ դոլարի, իսկ միջնաժամկետ և երկարաժկետ կտրվածքով՝ 30 մլրդ դոլարի շեմին»,-եզրափակել է Հաքան Ֆիդանը։
