Ամերիկյան «Bloomberg» լրատվական գործակալության տեղեկություններով՝ Թուրքիայի նախագահ Ռեջեփ Թայիփ Էրդողանը ՌԴ նախագահ Վլադիմիր Պուտինից խնդրել է հետ վերցնել ռուսական «S-400» հակաօդային պաշտպանության (ՀՕՊ) զենիթահրթիռային համակարգերը, ինչպես նաև վերադարձնել դրանց համար Թուրքիայի կողմից վճարված գումարը։ Այն կազմել էր ավելի քան 2 մլրդ դոլար:
Նշվում է, որ թեմայի շուրջ քննարկումները կայացել են դեկտեմբերի 12-ին Աշխաբադում կայացած Պուտին-Էրդողան հանդիպմանը, որի ժամանակ Էրդողանը հայտնել է, որ նման քայլով Թուրքիան մտադիր է ԱՄՆ-ի հետ հարաբերությունները բարելավել ու հնարավորություն ստանալ վերադառնալու ամերիկյան F-35 կործանիչների ծրագրին:
«Bloomberg» գործակալության համաձայն՝ գումարի վերադարձը կարող է իրականացվել (կոմպենսացվել) էներգետիկ ոլորտում տարատեսակ փոխհատուցումների միջոցով:
Բացի այդ, Թուրքիայի պաշտպանության նախարարության աղբյուրներն Էրդողան-Պուտին հանդիպումից առաջ «Turkiye Today» թերթի հետ զրույցում հերքել էին տեղեկությունը՝ նշելով, որ այդպիսի քննարկումներ օրակարգում չկան: «Bloomberg»-ի պնդումները հերքել էր նաև ռուսական կողմը:
Աղբյուր՝ Kronos
