Լրագրող–վերլուծաբան Մուրադ Յեթքինն անդրադարձել է Երուսաղեմում Իսրայելի, Հունաստանի և Կիպրոսի առաջնորդների մասնակցությամբ դեկտեմբերի 22-ին կայացած եռակողմ գագաթնաժողովին՝ նշելով, որ Մինչ Թուրքիա–ԵՄ հարաբերություններում երկերեսանիությունը շարունակվում է, Արևելյան Միջերկրականում վտանգավոր խաղը սրվում է:
Յեթքինի խոսքով՝ Իսրայելի վարչապետ Բենիամին Նեթանյահուն հանդիպումն անվանել է «ամենակարևորն արդյունքների առումով», ինչպես նաև իրեն տրված «Արդյո՞ք դաշինքն ուղղված է Թուրքիայի դեմ» հարցին ի պատասխան արված հայտարարությունից պարզ է դառնում, որ դաշինքն իրապես ուղղված է Թուրքիայի դեմ:
Նեթանյահուի «Մենք ոչ ոքի չենք ցանկանում մեզ դեմ դիտարկել» պատասխանը լրագրողը վերծանում է հետևյալ կերպ. «Դիվանագիտական լեզվով այն նշանակում է՝ դու հասկացիր այո»:
Յեթքինը նաև հիշեցրել է Կիպրոսի և Լիբանանի միջև ստորագրված բացառիկ տնտեսական գոտու համաձայնագիրը, որը, ըստ նրա, նպատակ ունի սահմանափակել Թուրքիայի և Հյուսիսային Կիպրոսի ինքնահռչակ թուրքական հանրապետության (ՀԿԹՀ) շահերը և Լիբանանին մոտեցնել Իսրայելի ազդեցության գոտուն։
Վերջինս նշում է, որ Իսրայելը ցանկանում է նաև կյանքի կոչել «Հնդկաստան-Մերձավոր Արևելք-Եվրոպա էներգետիկ միջանցքը», ինչի շնորհիվ Թուրքիան փաստացիորեն խաղից դուրս է մղվում:
«Կիպրոս կղզին ռազմավարական դիրք ունի՝ Հնդկաստանը ծովի մեջ գտնվող թունելներով Արաբական թերակղզուն, այնտեղից էլ Իսրայելին և Հունաստանին միացնող, ծայրահեղ թանկ և ռիսկային ծրագրի Միջերկրական ծովի անցման համար: Այսինքն, կարևոր է նաև Կիպրոսում Իսրայելի ռազմական ներկայությամբ Թուրքիային դուրս մղող ծրագրի կյանքը կոչումը»:
Նա նաև շեշտել է, որ Կիպրոսի՝ 2026-ի հունվարի 1-ից ԵՄ խորհրդի նախագահությունը ստանձնելը ևս պատահականություն չէ։
Աղբյուր՝ T24
