Թուրքիայի արտաքին գործերի նախարարությունը հաղորդագրություն է տարածել Սիրիայում «Սիրիայի քրդական ինքնապաշտպանական ուժերի» (YPG) (Սիրիայի հյուսիս-արևելքում գործող քրդական ուժեր) և բանակի միջև հայտարարված հրադադարի ու դրա ամբողջական ինտեգրման համաձայնագրի վերաբերյալ՝ նշելով, որ այն «պետք է նպաստի Սիրիայի տարածքային ամբողջականության, կայունության և անվտանգության ամրապնդմանը»։
Թուրքիայի ԱԳՆ-ի հաղորդագրությունում ասվել է, որ Սիրիայի ապագան պետք է կառուցվի ոչ թե ահաբեկչության ու պառակտման, այլ համախմբման, միասնականության և ինտեգրման հիման վրա՝ հույս հայտնելով, որ այդ իրողությունը «լիարժեք կգիտակցվի Սիրիայում բոլոր խմբերի և քաղաքացիների կողմից»։
Հաղորդագրության մեջ նշվել է նաև, որ համաձայնագիրը կարող է նպաստել ոչ միայն Սիրիայի ժողովրդի, այլև տարածաշրջանի, մասնավորապես՝ հարևան երկրների անվտանգության և խաղաղության ապահովմանը։
Ըստ Թուրքիայի ԱԳՆ-ի՝ 2024-ի դեկտեմբերի 8-ից «Սիրիայում սկսված նոր փուլը» կարևոր հնարավորություն է երկրի բարեկեցիկ ապագայի համար, և Թուրքիան շարունակելու է աջակցել Սիրիայի կառավարությանը՝ ահաբեկչության դեմ պայքարի և երկրի «վերականգնման» հարցում:
Աղբյուր՝ Trt Haber
