Թուրքիայում գործող ընդդիմադիր «Ժողովուրդների հավասարության և ժողովրդավարության» (DEM) կուսակցության «Իմրալըի պատվիրակությունը» հանդիպել է երկրի նախագահ Ռեջեփ Թայիփ Էրդողանի հետ։ Մոտ 1.5 ժամ տևած հանդիպումից հետո պատվիրակությունը քննարկումները որակել է արդյունավետ։
«Իմրալըի պատվիրակություն» – «DEM»-ի անդամներից կազմված պատվիրակություն է, որը քրդերի հետ առկա խնդիրները խաղաղ ճանապարհով լուծելու նպատակով պարբերաբար հանդիպումներ է ունենում Թուրքիայի կողմից ահաբեկչական ճանաչված «Քուրդիստանի բանվորական կուսակցության» հիմնադիր-առաջնորդ Աբդուլլահ Օջալանի հետ, ով գտնում է Թուրքիայի Իմրալը կղզում: Այդտեղից էլ ծագում է «Իմրալըի պատվիրակություն» անունը: Այն մեծ ներդրում է ունեցել քրդերի հետ կարգավորման ենթակա հարցերն օրենսդրական դաշտ բերելու հարցում:
Հանդիպման ընթացքում կողմերը վերահաստատել են «Խաղաղության և ժողովրդավարական հասարակության գործընթացը» վճռականությամբ շարունակելու իրենց համատեղ կամքը։ Հատուկ անդրադարձ է կատարվել Թուրքիայի ազգային մեծ ժողովում (TBMM) 467 կողմ ձայնով ընդունված «Ազգային համերաշխության և սոցիալական համախմբման ամրապնդման մասին» օրենքին, որը հանրությանը հայտնի է նաև որպես «Շրջանակային օրենք»։
Կողմերը գոհունակություն են հայտնել օրինագծի ընդունման կապակցությամբ՝ շեշտելով, որ այն դռներ է բացում ժողովրդավարության և քաղաքական դաշտի ամրապնդման նոր փուլի համար, ինչը կարևոր է երկրի և բոլոր քաղաքացիների համար։ Իմրալըի պատվիրակությունը հայտարարել է, որ շարունակելու է աշխատանքները «հանուն խաղաղության և ժողովրդավարության հետագա առաջընթացի»։
Պատվիրակությունը նաև շնորհայալություն է հայտնել այն բոլոր ուժերին, ովքեր մինչ օրս աջակցել են, առաջարկներ են արել, զգուշացրել են ինչ-որ բանի վերաբերյալ և կամ քննադատել են իրենց:
«Մենք շնորհակալություն ենք հայտնում այդպիսով մեզ ուժ տված քաղաքական կուսակցություններին»,- ասվել է հայտարարությունում:
Հիշեցնենք, որ «Շրջանակային օրենքի» նախագծի ընդունմամբ քրդերի հետ առկա խնդիրների լուծումը և քրդական զինված պայքարին վերջ տալուն ուղղված քայլերը պաշտոնապես հայտնվեցին Թուրքիայի օրենսդրական տիրույթում: Այդ օրենքով նախատեսվում են որոշակի համաներումներ, ինչպես նաև հնարավոր է փոփոխվեն օջալանի անազատության պայմանները:
Աղբյուր՝ Kronos Haber
