Թուրքիայի արտգործնախարար Հաքան Ֆիդանը Բրյուսելում հունական «TA NEA» թերթին տված հարցազրույցում Աթենքին կոչ է արել օգտվել պատմական պահից և համագործակցել Անկարայի հետ, քանի դեռ նախագահ Ռեջեփ Թայիփ Էրդողանը պաշտոնավարում է։ Ըստ նրա՝ հենց Էրդողանն ունի երկկողմ բարդ խնդիրները լուծելու համար անհրաժեշտ քաղաքական լեգիտիմությունը։
Ֆիդանի խոսքով՝ 2023 թ. մայիսից երկու երկրները որդեգրել են լարվածությունից խուսափելու և վստահության ամրապնդմանն առաջնահերթություն տալու քաղաքականություն։ Արդյունքում, ըստ նրա, վերջին 3 տարում Էգեյան ծովի երկնքում օդային ընդհարումներ չեն արձանագրվել, և իրավիճակը նկատելիորեն հանդարտվել է:
Միաժամանակ նախարարը քննադատել է Հունաստանի ներքաղաքական դաշտը՝ պնդելով, որ այն չի կարող գոյատևել առանց հակաթուրքական հռետորաբանության։
«Հունաստանի ներքին քաղաքականությանը հակաթուրքական հռետորաբանություն է անհրաժեշտ. դա ասպիրինի պես մի բան է։ Առանց Թուրքիայի գործոնի՝ հունական ներքաղաքական դաշտը պարզապես չի կարող գոյություն ունենալ»,- ասել է նա։
Էգեյան ծովի վիճելի տարածքների վերաբերյալ Ֆիդանը նշել է, որ հարցը դեռ լուրջ քննարկման թեմա չի դարձել և որ Թուրքիան պահանջում է միայն, որ հետազոտական աշխատանքների մասին իրեն գրավոր նախապես զգուշացվի, ինչը կօգնի խուսափել ստատուս քվոյի խախտումից։
Հունաստանի և Կիպրոսի միջև նախատեսվող էլեկտրական կապի նախագծի մասին Ֆիդանը նշել է, որ Թուրքիան դրան չի առարկում։ Սակայն Նյու Յորքում կայացած հանդիպման ժամանակ Էրդողանը Հունաստանի վարչապետ Կիրիակոս Միցոտակիսին ավելի ձեռնտու առաջարկ է արել։
Թուրքական կողմը առաջարկել է 2 մլրդ եվրոյից ավելի ծախսելու և մոտ 2000 կմ հեռավորությունից էլեկտրաէներգիա տեղափոխելու փոխարեն էներգիա գնել հենց Թուրքիայից։ Այն ընդամենը 70 մղոն հեռավորության վրա է և կարող է ապահովել ջրի, էլեկտրաէներգիայի և գազի կայուն մատակարարում։
Աղբյուր՝ Yeni Şafak
