Թուրքիայի փոխնախագահ Ջևդեթ Յըլմազն անդրադարձել է Սիրիայում Թուրքիայի դրոշի վրա կատարված հարձակմանը: Վերջինս, դատապարտելով այդ քայլը, դրանում մեղադրել է «Սիրիայի քրդական ինքնապաշտպանական ուժերին», որոնց Անկարան համարում է ահաբեկիչներ։
«Այս անբարոյականությունը ծրագրողները և կատարողներն անպայման պատասխան են տալու օրենքի առաջ: Մեր դրոշի վրա իրականացված հարձակումը ոչ մի կերպ անպատիժ չի մնալու»:
Ավելի վաղ Թուրքիայի ներքին գործերի նախարար Ալի Յերլիքայան հայտնել էր, որ Սիրիայի հյուսիս-արևելքում գտնվող Նուսայբին-Քամըշլը սահմանային հատվածում Թուրքիայի դրոշի վրա հարձակում է եղել։ Յերլիքայան նշել էր, որ դրոշի վրա հարձակումն իրականացվել է «Սիրիայի քրդական ինքնապաշտպանական ուժերի» (YPG) կողմից, որոնց Թուրքիան համարում է ահաբեկչական։ Վերջիններս հունվարի 20-ին մեծ ցնծությամբ իջեցրել էին Թուրքիայի դրոշը:
Յերլիքայան դատապարտել էր հարձակումը և նշել, որ այդ բացահայտ սադրանքն ուղղված է թուրք ազգի միասնության խաթարմանը և դա ոչ այլ ինչ է, քան ահաբեկչությունից զերծ Թուրքիա տանող «երթը» խափանելու փորձ: Դեպքի առնչությամբ 356 անձի դեմ հարուցվել է քրեական գործ, իսկ 35-ը կալանավորվել է։
Աղբյուր՝ Trt Haber, Ermeni Haber
