Թուրքիայում Իրանի գլխավոր հյուպատոս Նասեր Մոհաբեթին թուրքական «Demirören» լրատվական գործակալության հետ զրույցում խոսել է Թուրքիա-Իրան հարաբերություններից՝ դրանք որակելով որպես «կայուն և եղբայրական»։ Այս համատեքստում Մոհաբեթին մեկնաբանել է վերջերս Իրանի և ԱՄՆ-Իսրայելի միջև տեղի ունեցած բախումների ֆոնին Թուրքիայի պահվածքը:
Նրա խոսքով՝ Թուրքիայի նախագահ Ռեջեփ Թայիփ Էրդողանի և ԱԳ նախարար Հաքան Ֆիդանի ուղերձները եղել են դրական, և այդ երկիրն ակտիվորեն փորձել է նպաստել պատերազմի ավարտելուն։ Իրանցի դիվանագետը նաև նշել է, որ Իրանը երբեք չի թիրախավորել Թուրքիան և հարաբերությունները շարունակելու է դիտարկել որպես «եղբայրական»։
«Թուրքիայի բոլոր ջանքերն ուղղված էին պատերազմը դադարեցնելուն», – հավելել է նա։
Աղբյուր՝ Haber Türk
