Հունիսի 8-ին Ստամբուլում Թուրքիայի արտգործնախարար Հաքան Ֆիդանի հրավերով կկայանա Թուրքիայի, Ադրբեջանի և Վրաստանի արտաքին գործերի նախարարների 10-րդ եռակողմ հանդիպումը, որին կմասնակցեն Ջեյհուն Բայրամովը և Մակա Բոճորիշվիլին:
Թուրքական «TRT» լրատվականը, հղում անելով Թուրքիայի արտգործնախարարության աղբյուրներին, նշել է, որ բանակցությունների օրակարգում ներառված են Հարավային Կովկասում տարածաշրջանային զարգացման ու անվտանգության հարցերը, էներգետիկ համագործակցությունը և «Միջին միջանցքի» շրջանակում տրանսպորտային նախագծերի, մասնավորապես՝ Բաքու-Թբիլիսի-Կարս երկաթգծի ընդլայնումը և զարգացումը:
Ակնկալվում է, որ Ֆիդանը կընդգծի տարածաշրջանում մնայուն խաղաղության հաստատման ռազմավարական կարևորությունը և կնշի, որ ռուս-ուկրաինական պատերազմը շարունակում է սպառնալիք մնալ Հարավային Կովկասի ու Սև ծովի անվտանգության համար:
Նախատեսվում է, որ անդրադարձ կկատարվի Հարավային Կովկասին ու Ֆիդանը կհայտարարի, որ Կովկասում հարատև խաղաղության, կայունության և կարգավորման հաստատումը ռազմավարական նշանակություն ունի տարածաշրջանային բարօրության ամրապնդման համար։
Աղբյուր՝ TRT Haber
