Սաուդյան Արաբիայի նախարարների խորհուրդը հաստատել է Թուրքիայի հետ երկաթուղային ոլորտում համագործակցության համաձայնագիրը՝ ճանապարհ բացելով երկու երկրների միջև տրանսպորտային և լոգիստիկ կապերի զարգացման համար։
Համաձայնագիրը ստորագրվել էր Թուրքիայի տրանսպորտի և ենթակառուցվածքների նախարարության ու Սաուդյան Արաբիայի տրանսպորտային գերատեսչության միջև։ Այն հաստատվել է Ռիադում՝ Սաուդյան Արաբիայի թագաժառանգ Մուհամեդ բին Սալմանի նախագահությամբ անցկացված կառավարության նիստում։
Համաձայնագրի ստորագրմանը նախորդել էր Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուի հունիսին կատարած այցը Սաուդյան Արաբիա, որի ընթացքում երկու երկրները պայմանավորվածություններ էին ձեռք բերել երկաթուղային ոլորտում և լոգիստիկ ծառայությունների ուղղությամբ համագործակցության վերաբերյալ։
Բացի այդ, Թուրքիայի և Սաուդյան Արաբիայի միջև էներգետիկ համագործակցությունն ընդլայնվում է։ COP31-ի շրջանակում Թուրքիայի նախագահ Ռեջեփ Թայիփ Էրդողանի ներկայությամբ երկու երկրների էներգետիկայի նախարարները ստորագրել են էլեկտրաէներգետիկ նախագծերի ոլորտում համագործակցության հուշագիր։
Թուրքիայի էներգետիկայի նախարար Ալփարսլան Բայրաքթարի խոսքով՝ համաձայնագրի շրջանակում նախատեսվում է իրականացնել ընդհանուր 5000 մեգավատ հզորությամբ վերականգնվող էներգետիկայի նախագծեր։
Բայրաքթարը նշել է, որ նոր ներդրումները կնպաստեն Թուրքիայի էներգետիկ համակարգի զարգացմանը և կամրապնդեն Սաուդյան Արաբիայի հետ ռազմավարական համագործակցությունը։
Աղբյուր՝ Hürriyet, Haberglobal
