Եվրամիության Թուրքիայում գործող պատվիրակությունը հրապարակել է հասարակական կարծիքի վերջին հարցման արդյունքները։ Հարցվածների 51%-ը ԵՄ-ին ընդհանուր առմամբ դրական է վերաբերվում, սակայն Թուրքիայի անդամակցության հեռանկարների վերաբերյալ վստահություն գրեթե չկա։ Մասնակիցների միայն 15%-ն է հավատում, որ երկիրը կարող է անդամակցել առաջիկա հինգ տարիներին, մինչդեռ 22 տոկոսը համոզված է, որ դա երբեք չի տեղի ունենա։
Հարցման համաձայն՝ այսօր հանրության 58%-ը հավանական հանրաքվեում կողմ կքվեարկեր ԵՄ անդամակցությանը։
Բնակչության մեծ մասը կարծում է, որ ԵՄ-ին միանալը առավելություններ կունենա, մասնավորապես՝ տնտեսական զարգացում (59%), անվտանգության ապահովում (31%), ինչպես նաև կրթական ու մշակութային ծրագրերի հնարավորություններ (24%)։ Միևնույն ժամանակ բարձրաձայնվել են մտահոգություններ՝ կապված երիտասարդների արտագաղթի, մշակութային ինքնության կորուստի և ներգաղթի աճի վտանգի հետ։
Հարցումն անդրադարձել է նաև միջազգային կառույցների նկատմամբ վստահությանը։ ԵՄ-ին վստահում է հարցվածների 58%-ը, Համաշխարհային բանկին՝ 47%-ը, ՆԱՏՕ-ին՝ 43%-ը, ՄԱԿ-ին՝ 41%-ը, իսկ որպես երկիր Ռուսաստանին վստահում է հարցվածների 35%-ը ։ Այս պատկերը ցույց է տալիս, որ ԵՄ-ն շարունակում է մնալ Թուրքիայի հասարակության աչքում առավել վստահելի գործընկեր, թեև անդամակցության հույսերը գնալով մարում են։
Աղբյուր՝ Milliyet
