Անթալիայի դիվանագիտական ֆորումի ընթացքում հանդիպել են Թուրքիայի և Նիգերիայի պաշտպանության նախարարները։ Կողմերը քննարկել են պաշտպանության ոլորտում համագործակցության խորացումն ու զարգացումը և անդրադարձել կրթության, տեխնոլոգիաների փոխանցման և համատեղ նախագծերին առնչվող հարցերի։
Նախարարները նաև փոխըմբռնման հուշագիր են ստորագրել, որով նախատեսվում է համապարփակ ռազմական ուսումնական բազա հիմնել Նիգերիայում։
Նշվում է, որ այդ ուսումնական բազան կծառայի որպես երկարաժամկետ ուսուցման և կարողությունների զարգացման կենտրոն։ Կանցկացվեն վերապատրաստումներ հակաահաբեկչության, հատուկ գործողությունների, հետախուզության համակարգման, անօդաչու թռչող սարքերից պաշտպանության մասով:
Փոխըմբռնման համաձայնագրի առաջին փուլում նիգերիացի զինվորական անձնակազմը կուղարկվի Թուրքիա՝ վերապատրաստման, լեզվի ուսուցման և դաշտային վարժանքների համար: Ակնկալվում է, որ այս գործընթացը կարագացնի երկու երկրների միջև ռազմական տեղեկատվության փոխանակումը:
Աղբյուր՝ Alanya Postası
